"ToplumTV işi" çərçivəsində həbs edilən jurnalist Fərid İsmayılovun səhhətindəki problemlər və qeyri-insani rəftardan şikayət etdiyi bildirilir. Bu barədə onun yaxınları məlumat verib. Vurğulanıb ki, F.İsmayılovun qan şəkərində problem var, bu da ona həm təcridxanada, həm də məhkəməyə gətirilib-aparılanda problemlər yaradır: "Hətta sistemlə köçürülməsi üçün qida əlavələri, dərmanlar alıb göndərmişik".
Yaxınların iddiasına görə, Bakı İstintaq Təcridxanasında F.İsmayilova lazımi qaydada sistem köçürülmür. Onların sözlərinə görə, iyunun 23-də F.İsmayılov məhkəmədə (bu iş üzrə məhkəmə prosesi davam edir) bildirib ki, o, həm də miqrendən əziyyət çəkir.
Hələlik, bütün bu deyilənlərə Penitensiar Xidmət və başqa rəsmi qurumlardan münasibət almaq mümkün olmayıb. Amma rəsmi qurumlar, bir qayda olaraq, vurğulayır ki, təcridxana və cəzaçəkmə müəssisələrində saxlanan şəxslərlə qanun çərçivəsində davaranılır.
2024-cü il martın 6-da polis Bakıda "ToplumTV" onlayn televiziyasının ofisində axtarış aparıb və media qurumunun ofisi möhürlənib. Ümumilikdə "ToplumTV işi" üzrə 10-a yaxın şəxs həbs edilib. Onlara ilkin olaraq Cinayət Məcəlləsinin 206.3.2-ci (qaçaqmalçılıq, bir qrup şəxslə əvvəlcədən əlbir olaraq törədildikdə) maddəsi ilə cinayət işi açılsa da, bu il yanvarın 17-də ağırlaşlaşdırıcı maddələrlə yeni ittihamlar irəli sürülüb.
"ToplumTV" bəyanat yayaraq baş verənlərin onların peşə fəaliyyətləri ilə əlaqəli olduğunu bildirib və bunu müstəqil mediaya basqı kimi qiymətləndirib.
Xatırlama
2023-cü ilin noyabrından başlayaraq Azərbaycanda qruplar halında 30-dan çox jurnalist, ictimai fəal qaçaqmalçılıq ittihamı ilə həbs edilib. Onlar ittihamla razılaşmır, bunu peşə fəaliyyətləri və siyasi sifarişlə izah edirlər. Sonradan onlardan bir çoxunun ittihamı ağırlaşdırılıb.
Ötən həftə onlardan "AbzasMedia işi" üzrə günahlandırılan yeddi jurnalistə 9 ildən 7 il 6 aya qədər həbs cəzası verilib. Onların arasında AzadlıqRadiosunun 9 il həbs cəzası alan jurnalisti Fərid Mehralızadə də var.
Yerli hüquq-müdafiə təşkilatlarının hazırladığı siyahılara görə, indi Azərbaycan həbsxanalarında 370-dən çox siyasi məhbus var. Rəsmilərsə, bir qayda olaraq, vurğulayırlar ki, ölkədə heç kim peşə fəaliyyəti ilə bağlı, siyasi əsaslarla həbs edilmir. Onlar iddia edirlər ki, həmin siyahılarda adları yer alanlar törətdikləri əmələ görə məsuliyyətə cəlb olunublar.